تفصيل الملايه بفستونة خطوة بخطوة

تفصيل الملايه بفستونة خطوة بخطوه

*******************

بسم الله الرحمن الرحيم 

انهردة حنتعلم مع بعض طريقه قص وتفصيل الملايه بفستونة خطوة بخطوة مع الصور فتابعوا معايا يا قمرات 

1- حنجيب القماش 5 متر يا بنات مش 4 ونص زى الملايه العادية وزى ما اتعلمنا قبل كدا انك تقصى القماش وهو مطبق على طبقتين 

2- الاول حتقصى مترين وتركنيهم على جمب دول للمخدات والخداديات حيتفضل معاكى 3 متر كدا تمام

3- تقصى منهم نص متر وتركنية على جمب كدا تمام حيتفضل معاكى مترين ونص 

حوريكى شكلهم بيبقوا ازاى وهما مطبقين 

4- حتفردى بقا القماش وترجعى تطبقية تانى بالطول هو بيكون جاى مطبق بالعرض من عند بتاع القماش واحنا اتعلمنا ازاى نقص بالعرض دلوقتى بقا تفردية وتطبقية بالطول زى ما موجود فى الصورة كدا 

5- وطبقيها كمان مرة كل دة بالطول حتبقى زى كدا 

6-وتطبقيها كمان مرة بالطول كدا بقا عرض القماش 30 سنتى وطبقناها 3 مرات يا بنات بالطول ماشى كدا 

7- حتجيبى طبق واسع او صنيه واسعه وتحطيها على القماش من فوق فى النص بالشكل دة 

8- وتمشى مع الطبق بالمقص وتقصى على دوران الطبق بالشكل دة كدا زى الصورة علشان تطلعى فى النهاية شكل الفستونة المدور 

9- بس المهم تمشى مع الدوران صح او ممكن ترسمى الدوران بالمركر او التباشير وتقسى عليها بالظبط وكدا حيبقى شكلها بعد القص

10- افردى بقا الملايه حتلاقيها متساويه بالشكل دة وواخدة الدوران المطلوب سرفلى بقا الدورانات بمكنة سرفله 3 فتله ولازم تتسرفل  وخلى بالك وانتى بتقصى بيكون القماش على الوش مش الظهر زى الصورة كدا ماشى وتكونى مطبقة بالطول زى ما قلنا قبل كدا يا بنات

11-خلاص كدا بعد ما عملتى الدوران بتاع الفستونة واتعلمتية وكله تمام التمام قدامك بقا مودلين للملايه بفستونة

الموديل الاول بالملايه بالفستونة

 يا اما تعملى المودل اللى فى الصورة اللى هو بدورين فستونات وفى الحاله دى حتجيبى النص متر اللى قصناه قبل كدا وتطبقى بنفس الطريقة اللى علمتهالك وتقصى الدوران وتخيطيه فوق الدوران التانى بالشكل دة اللى فى الصورة 

12-طيب علشان تخيطية صح بقا تعملى ايه اول حاجة تقلبى القماش  على الظهر بالشكل دة كدا 

13-وعلي الدهر بقي هاتي النص متر اللي انتي عملتيه وحطيه وخلي برضو دهره لفوق تمام حطيه بقي بحيث يكون الدورانات بتاعت النص متر اطول من الملاية كويس كده ....واعملي علامة بالمارك او القلم خدي  خط بطول الملاية عشان تحددي هتخيطي النص متر ده فين تمام

 وعلي المكنة خيطي بقي النص متر في الملاية عشان يديكي دورين دورانات واعدلي الملاية اعملي فيونكة صغيرة او اعملي خط بشريط الستان فوق الخياطة حسب ذوقك

الموديل التانى من الملايه بالفستونة 

14-وكده هتجيبي النص متر وتقطعيه شرطان صغيرة عرضها 5سم تقريبا او اكثر وتسرفليها وتبداي علي اورانات تركبي الشرطان دي وانتي بتخيطي تتني حتة من الشريط عشان يديكي كشكشة كده

وتجيبي بقي الستان تعملي فيونكة صغيرة فوق كل دوران .....

 كده اهنا خلصنا الموديلين سواء شرطان او دورين دورانات ......في بقي موديل انا بحبه جدا بستبدل الدورانات بمثلثات نفس الخطوات بالضبط بس مش بستخدم طبق بقص علي شكل مثلث واسرفل واعمل النص متر برضو مثلثات  اسرفله واركبه ف دهر الملاية يظهر بقي من تحت دورين مثلثات .....موديل المثلثات بعمله بدون ستان ولا شرطان بيعتمد علي لون خيط السرفلة مثلا لو القماش اسود بسرفله باحمر او فوشيا ولو القماش بمبي بسرفله بفوشيا تقيل وهكذا