غرزة الياسمينة الاساسية
بسم الله الرحمن الرحيم
............................
انهردة حنتكلم على اهم واحلى غرزة من غرز الاسموكس وهى غرزة الياسمينة انا عن نفسى بعتبر اانها اهم غرزة فى الاسموكس ووان اللى عايزة تتعلم اسموكس لازم تتعلم الغرزة دى لان بيطلع منها غرز تانية كتير واشكال مختلفة وان شاء الله حنتكلم عنهم بالتفصيل بعد كدا
الغرزة دى عجيبة جدا وشها غرزة وظهرها غرزة وبيطلع منها غرز تانية كتير جدا كل غرزة منهم ليها شكل مختلف تماما عن اختها وهى فى الاصل غرزة الباسمينة
علشان كدا ياريت تركزوا معايا فى الغرزة دى انا انهردة حشرح غرزة الياسمينة الاساسية ووشها وظهرها وبعد كدا ان شاء الله حشرح باقى اشكالها بالتفصيل
نبتدى على بركة الله الشرح
غرزة الياسمينة يا بنات الاساسية بنرسم باترونا على وش القماش
طبعا الكل مستغرب نرسم على وش القماش ازاى يعنى طيب والرسم دة مش حيبان .
والاجابة ايوة على وش القماش وايوة اكيد الرسم حيبان لاكن رد على كلامكم عايزة اقول ليكم انكم لازم تستخدموا قلم الرسم على القماش ودة افضل كتير لانة لما بتغسلى القماش بينزل اللون وبترجع القماشة والشغل زى الفل ودة احسن ليكى وللفنش بتاع شغلك.
عايزة اقول كمان معلومة مهمة يا بنات لما تشتغلى بالستان ياريت تحطى قماشة عادية تحت الستان وانتى بترسمى على الستان علشان متتحركش معاكى ويتلخبط رسم المربعات وبالتالى يتلخبط كل شغلك
طيب نشوف بقا خطواط غرزة الياسمينة.
الاول زى ما قلنا نرسم المربعات بتاعتنا على وش القماش زى ما هو باين فى الشكل كدا يا بنات ومتنسيش تسيبى مشافة 5 سنتى على الجوانب ودة علشان الفنش يكون مظبوط.
المربعات زى منتى عايزة انا هنا شغاله على 4 سنتى وخلى بالك جزء الرسم على القماش ورسم المربعات دة اهم جزء يعنى لازم تقيسى صح ومنغير اى غلط علشان شغلك بعد كدا يكون صح والشكل النهائى يكون صح
حنا خلصنا رسم المربعات بالطول والعرض والمقاش المطلوب وسبنا ال 5 سنتى من على الجوانب نشوف بقا حنرسم الباترون ازاى على القماش.
بالطريقة دى حنرسم الباترون او المخطط على القماش انا حرقم المربعات علشان اسهل عليكم مكان دخول وخروج الابرة علشان تشتغلوا صح يا بنات
كدا بقا احنا جاهزين علشان نشتغل على القماش رسمنا وكله تمام حنبتدى بقا ندخل الابرة فى رقم 1 زى الصورة كدا ووبعدين رقم اتنين وبعدين رقم 3 وبعدين رقم 4 كدا تمام يا بنات يارب تكونوا متابعين معايا صح
بعد كدا حنقوم بجذب الخيط ونجمعة كله فى مكان واحد زى الصور كدا وبعدين حنتبت على الغرزة كويس
بعد كدا حنحط لولى او استرس الماظ اى حاجة تحبيها تطرزى بيها الوردة علشان تدارى الغرزة وكمان تديكى شكل جمالى اكتر ومنقطعش الخيط ندخلة جوة الغرزة زى ما موجود فى الصور..
كدا احنا خلصنا مريع او خلصنا واحدة من غرز الياسمينة ندخل بقا على المربع اللى بعدة او على الغرزة التانية
وحنعمل زى ما عملنا فى الغرزة الاولى حندخل الابرة فى رقم واحد 1 وبعدين رقم 2 ورقم 3 ورقم اربعة ونشد الخيط نصم الاربع اركان بتاعت المربع مع بعض وبعد كدا نطرزها باللولى فى الوسط
كدا يبقى وريتك خطواط مربعين او غرزتين من غرزة الياسمسنة انتى بقا تكملى باقى القماش بنفس الشكل ونفس الطريقة لحد ما تخلصى كل قطعة القماش اللى معاكى والياسمسنة بتاخد صعف القماش او اقل حاجة بسيطة يعنى لو عايزة قطعة نص متر فى نص متر تجيبى القماش متر فى متر
دة شكل غرزة الياسمينة بعد ما خلصناها من الامام كدا غرزة ماشى ودة شكلها نشوف بقا الظهر ازاى غرزة تانية وازاى ممكن نستفاد منها
ودة كدا الظهر شايفين يا بنات غرزة تانى خالص حلوة ومرتبة وبنعمل منها مفارش كمان طيب لو عايزة الغرزة دى اعمل اية حقولك انا الخطواط
نفس الخطوات اللى فوق بس ترسمى الباترون على الظهر يعنى المربعات والمخطط على الظهر يقوم يطلع الشكل دة قدام وبكدا تكون عندك غرزة تانى حوريكى صور
للشغل بظهر الياسمينة بس لما تشتغلى بعد ما تثبتى اللولى فى وسط غرزة الياسمينة تقطعى الخيط وبكدا يكون عندك الظهر جاهز يكون غرزة تانية
ادى الظهر يا بنات شفتوا ازاى بنعمل منة غرزة تانى مش بقول ليكم غرزة عجيبة وججميله ومهمة فى نفس الوقت وان شاء الله حشرح ليكم باقى الغرز اللى بتطلع منها
ودة المخطط او الباترون اللى حتحتاجوة علشان يشتغلوا غرزة الياسمسنة اتمنى انى اكون عرفت اشرح واتمنى اكون افدتكم يارب
إرسال تعليق