احسن طريقة لقص وتفصيل الكنب البلدى

احسن طريقة لقص وتفصيل الكنب البلدى

السلام عليكم ورحمة الله وبركاته الناس اللي عاوزين طريقه عمل  فرش الكنب  البلدي إليكم الشرح.بالتفصيل وواحدة واحدة معايا علشان تفهموا كويس بالله عليكم
انهردة حشرح فرش الكنب البلدى العادى مش الحديث .

فرش الكنب بتاع زمان مش المودرن وان شاء الله حشرح المودرن او الحديث مرة تانى

وحشرح معانا انهردة المساند الدوران يعنى الكنب البلدى اللى فية كسر فى الكرنيش والمساند دوران ماشى كدا يا بنات علشان فية انواع تانى واشكال تانى حنشرحها بعد كدا ان شاء الله بالتفصيل....

وان شاء الله حشرح اكتر من طريقة لقص فرش الكنب البلدى فياريت نتابع مع بعض الطرق المختلفة دى...

اولا كميه القماش المطلوبه

لو الكنبه ليها تلت مساند دوران بنجيب قماش سبعه متر لو الكنبه اتنين مسند مستطيل بياخدو 6متر ودي ان شاء الله الأمتار بالظبط. فية ناس بتجيب اكتر من كدا ودة علشان بتحب تعمل فرش الكنب كالونات مش كسر فانتى وراحتك بس دة المقاس الصحيح عايزة تزودى متر او نص متر وتزودى فى الكالونات براحتك انا بشرح المقاس المتعارف علية والصحيح...

ثانيا مقاسات الكنبه 

مقاسات الكنبة موحد بس بيبقى فيها اختلافات بسيطه بس المقاس الصحيح والمتعارف علية هو 65*200والارتفاع بيبقى 45او 50سم. وده معظم مقاست الكنب المقاس ده.

ثالثا طريقه القص والتفصيل

وركزو احنا هنتكلم على الكنبه اللي فيها مساند دوران لأنها الأصعب وبتالي لو فهمتها هتبقى المساند المستطيله سهله.

 وركزو فيها  معايا كويس احنا معانا 7متر قماش هنقص قطعه 210سم وهنقص منها قطعه بطول تبقى 82*210 ودي هتبقى القاعده بعد كده هتفضل قطعه 58سم *210 هنطلع منهم الحائط اللي في وش الشلته بتكون مقاسها 15سم *340 وهيفضل قطعه برده منها عرضها 28سم *210سم هنقسمها النص هتبقى 14*210 قطعتين ويتوصلو في بعض ودول للحائط بتاع التلت مساند الدوران كده تكون أول قطعه من القماش اتقصت ومفضلش منها اي حاجه وكل قطعه معروفه هتركب فين.

بعد كده نقص قطعه تانيه 225سم دول المساند طيب طريقه قصهم هنقص من عرض القماش 30سم وهيفضل معانا 110سم بطول 225 هنتلتهم قد بعض تلت قطع هيبقو مقاس 75*110 بعد كده نطبق كل قاشه لوحدها بحيث تكون 75*55 بعد نطبق كمان طبقه بحيث يكون معانا القماش 37.5*55 بعد كده نعمل طبعه على نص المسند وبعد كده نحط الطبعه بحيث الجنب المقفول من المسند يكون على الجنب العدل من الطبعه ويكون الدوران بتاع الطبعه على الجنب المفتوح بعد كده اسيب 2سم خياطه واعمل علامات واقص الدوران هيعطي معانا ربع دوران من فوق وباقي الجنب عدل بعد كده هفرد المسند هيبقى معانا طبقتين مقصوصين على شكل نص دايره من فوق زي المسند بالظبط مع حساب الخياطه وكده نكون خلصنا الجزء الثاني من القماش.

باقي كميه القماش الموجوده هيفضل بعد مقصينا القاعده والمساند هيفضل 265سم في عرض القماش اللي هو 140سم هنتلت القماش كله بحيث يكون معانا تلت طبقات 46.5*265 بعد كده نقصهم ونوصلهم شريط واحد وده هيبقى الكرنيش وهيتكسر تكسير بلاسيه الكسر ورا بعض بحيث الشكل الجمالى بتاعها يبقى ممتاز لازم الكسر تبقى متناسقه وبكده تكون مرحلت القص خلصت.

رابعا مرحله الخياطه

طبعا القماش كله مقصوص معانا هنسرفله كله على ماكينه السرفله بعد كده نبدا مرحله التجميع اولا هنجيب القاعده ونخيط الحائط مع القاعده بس ملحوظه مهمه نبدأ الخياطه من عند 15سم ونلف الحائط معانا بحيث اللي يعمل معانا زاويه في آخر الشلته تلبس فيها ويكون الفنش بتاعها كويس ونخيط الحائط ونجي في نهايه الشلته نعمل علام 15سم ونص الزياده لو فيه ونلف 15سم زي البدايه كده تكون الكنبه محكومه من الاربع زوايا ليها بعد كده نجيب الكرنيش ونبدأ نكسر الكرنيش على الحائط الكسر كلها ورا بعض متلاحمه ويكون الفراغ بين كل كسره وكسره 5سم بعد مخلصتو تركيب الكرنيش تعملو تانيه من تحت خالص علشان شكل الشغل يطلع كويس.

بعد كده نخش على المساند نعلم نص المسند ونركب الحائط بتاعنا اللي هو 14سم ونبدأ الخياطه من نص المسند ونزل شمال مره ويمين مره وبعد كده نركب الطبقه التانيه نفس النظام من المنتصف بحيث المسند يظبط معاكم في الدوران وهكذا للمسندين الآخرين.

ملحوظه

ممكن تعملو اي اكسسوارات على مزاجكم لو تحطو فتيل او ديل قط كل دي كمليات على حسب الزبون.

- كدا احنا انتهينا من اول طريقى لقص فرش الكنب البلدى وان شاء الله حشرح طرق تانية فارجوا المتابعة

.